Kuiz – Njohuri

Prezantimi i aktivitetit

Përshkrim :

Kuizi është një mjet mësimor përmes lojës – nuk bëhet fjalë për një vlerësim. Ushtrimi duhet të shoqërohet, të paktën pjesërisht, me pyetje të thjeshta dhe të arritshme për t’i siguruar pjesëmarrësit mbi aftësinë e tyre për të trajtuar temën dhe kështu të inkurajojë më shumë përfshirjen e tyre.

Ky ushtrim, për shembull, lejon që të trajtohet koncepti i “infox”-it në praktikë përpara se të kërkohet ta përcaktojmë në mënyrë teorike dhe, njëkohësisht, të aktivizojmë drejtpërdrejt mendimin e tyre kritik.

Ai shërben gjithashtu për t’i befasuar pjesëmarrësit mbi përfundimet e nxituara që mund të nxirren nga një informacion ose një imazh.

Në mënyrë konkrete, ky ushtrim lejon të ngrihen të gjitha llojet e pyetjeve të lidhura me edukimin kritik për mediat.

Objektivat:

– Të inkurajohet pjesëmarrja gojore, dialogu, argumentimi dhe të forcohet pjesa teorike e seminarit falë një aktiviteti praktik e kognitiv

– Të krijohet një dinamikë grupi përmes frymës së ekipit

– Të mundësohet dhënia në mënyrë të zgjuar e informacionit teorik mbi botën mediatike (liria e shtypit, datat historike etj.).

Zhvillimi i aktivitetit

1/ Trajneri përgatit rreth pesëmbëdhjetë pyetje (një faqe me pyetje, e ndjekur nga një faqe me përgjigje)

2/ Trajneri ndan pjesëmarrësit në grupe prej 4 deri në 5 persona

3/ Të paraqitura në formën e pyetjeve me alternativa, do t’i kërkohet çdo grupi të përgjigjet në mënyrë kolektive duke zgjedhur vetëm një përgjigje nga disa opsione të ofruara.

4/ Për çdo përgjigje të dhënë, trajneri u kërkon çdo ekipi të justifikojë zgjedhjen e tyre me një përgjigje të shkurtër dhe gojore

5/ Trajneri shpall përgjigjen e saktë. Më pas ai shënon pikët e fituara nga çdo ekip (të përsëritet për çdo pyetje duke numëruar 1 pikë për çdo përgjigje të saktë)

Ideale është të krijoni kuizin tuaj në lidhje me temat në fjalë. Për t’u frymëzuar dhe/ose për t’i ndërgjegjësuar pjesëmarrësit mbi funksionimin e kuizeve, ekzistojnë faqe interneti, veçanërisht “quipoquiz.com” që ofron kategori të ndryshme (këtu kategoria “shkencë apo trillim” është e përshtatshme) dhe kuize argëtuese.

Shembull pyetjeje:

Sipas jush, në cilin vend ndodhet Serbia në renditjen botërore të vendeve sipas lirisë së shtypit në vitin 2020?

1. 2
2. 20
3. 71
4. 93

Përgjigjja: D (Serbia është në vendin e 93-të në Renditjen botërore të lirisë së shtypit 2020. Serbia vazhdon të jetë një vend shpesh i rrezikshëm për gazetarët dhe ku lajmet e rreme përhapen shumë shpejt. Shumica e hetimeve që lidhen me sulmet ndaj reporterëve janë të bllokuara ose të mbyllura pa rezultat.)